Aufwind

Fliagt dein Seel net himmelweit,
stroaft am Bóm dein Sein.
Klopft da Zoaga Traurigkeit,
brennt dir  Angst grad ein.

Gspürst in dir koan hoamligs Liad,
dös dein Stoanweg rundt,
findst koan Bruck, die drüberweist
übern Felsngrund,

brauchst an Wind, der drüberfahrt
übern staubign Schuah,
der dih aushebt, weitertragt,
auf a neuche Spur,

blast er dir ah rau entgegn,
gilt sein Kraft bald dir,
derfst dem leichtn Lüftl traun,
Windseel aus Papier!